تجربة كابريس 2007 SS

السلام عليكم ورحمة الله وبركاته

بسم الله الرحمن الرحيم

سيارتنا اللي بنجربها اليوم هي كابرس اس اس الجديدة

التجربة تمت مع اخوية CROWER هوه اللي جاب السيارة

ملاحظات قبل ما ابدأ :

_ التجربة تمت بسرعة ما صورت وايد صور
_ خبرتي تعبانه بالتصوير اسمحولي
_ ما اعرف ارتب مواضيع بصراحة بس بحاول

معلومات عن السيارة : العداد وقت التجربة 1030 كم
السيارة سيارة شخصية وليست سيارة تجارب من الوكالة
السعر : 130 الف درهم تقريبا

البداية:
بصراحة سيارة روعة بكل معنى الكلمة وتغيير الشكل بصراحة كامل ما احس فيها شبه بالشكل السابق ابدا
ومن وجهة نظري انها تغيرت للافضل وتحسنت الجودة بشكل كبير جدا من الداخل والخارج

المحرك تغير فالموديل الجديد وصار 6.0 ليتر بقوة 360 حصان (تقريبا)

الشكل:
بصراحة اول ما شفت صورة السيارة عالنت ما دخلت مزاجي
بس عالطبيعة حلوة بصراحة وافضلها بمراحل عالجيل السابق
من ناحية الحجم احس بها صغرت عن قبل وراح عنها الشكل الصابوني
المقدمة جميلة جدا وتوزيع الانوار جدا ممتاز
الخلفية ما اعرف كيف اوصفها , صغيرة لكن حلوة بعد احس فيها شبه من سيارة اوبل ما اذكر اسمها

بشكل عام السيارة فالصور مقبول شكلها لكن عالطبيعة حلوة (رأيي الشخصي روعة)

المحرك والقوة:
المحرك نفس ما تعرفون هوه V8 6.0L 360hp (المحرك السابق 5.7 325 حصان)
المحرك بصراحة ممتاز جدا بس العيب الكبير فالقير اللي ما تغير (4 غيار) مع انه فالصور شفنا تبترونك وقالوا 6 غيار
وفيه زر Sport Shift يخلي تبديلات القير خشنة وحق سباق وبصراحة تحس بالفرق
بصراحة ما سقت الموديل القديم علشان احكم عالفرق لكن جربناها مع سيارتين
فورد موستنغ الجديد اوتو + نيسان Z350 اوتو
بصراحة طافهم وهو مرتاح الكابرس وحتى اذا دعسوا قدامه يلحقهم ويطوفهم ما توقعناه لهذي الدرجة يمشي

بس لو كان 6 غيار اتوقع كان بيفرق بشكل كبير فالتسارع
السيارة طبعا محددة سرعتها 250 كم

الداخلية:
ما توقعت بصراحة جودة الجي ام ترتفع بالشكل الكبير اللي شفته فالكابرس الجديد
مقارنة بالقديم اعطيه تحسن بنسبة 60% فالجودة الداخلية
تحسن كل شي مكانه حلو ومرتب وتوزيعه حلو

احلى شي بصراحة عجبني تصميم المقود رياضي جدا وشكله جميل

الشاشة من صنع شركة Blaupunkt وفيها نظام ملاحة لكن ما شغلته بصراحة
وفيها وصلة Ipod بعد

الكراسي مريحة جدا بالنسبة لي
الكراسي الخلفية مريحة وفيها مساحة كبيرة للأرجل نفس الكابرس السابق تقريبا
الصندوق الخلفي ضخم جدا وبصراحة انصدمت يوم شفته (فالصورة ما يبين بس عالطبيعة بصراحة خيالي)

الايجابيات :
بصراحة السيارة وايد عجبتني من كل النواحي وفيها ايجابيات كثيرة
+ ثابتة جدا فالشارع
+ قوية ومحركها ممتاز
+وايد بصراحة اشياء حلوة ما اقدر اعددها
+صرفيتها ممتازة على انه الخزان صغير تقريبا 70 درهم فل

السلبيات:
للامانة انا ما جربت السيارة غير نص ساعة فيمكن ما لاحظت سلبيات غير اشياء بسيطة (اسألوا Crower هو استعملها تقريبا ساعتين)
– غيار الاربع سرعات لازم يغيرونه بصراحة ما ينفع
– فيها صوت هواء بعد 120
بصراحة هذا اللي شفته
ويمكن فيها عيوب عالمدى الطويل بس ما اقدر احكم

بصراحة رأيي الشخصي انها سيارة تستاهل وزيادة وهولدن ابدعوا فيها
صح اني ما كنت مقتنع وايد فالكابرس قبل بس الحين افكر بجد اشتريه
تقييمي 9 من
10

[NOTE] تجربة AD1 و CROWER من الخليج للسيارات [/NOTE]